21 лютага ва ўсім свеце святкуецца Міжнародны дзень роднай мовы
21 лютага ва ўсім свеце святкуецца Міжнародны дзень роднай мовы. Гэта дата была ўстаноўлена ЮНЕСКА ў 1999 годзе з мэтай захавання і развіцця моўнай разнастайнасці і шматмоўя. Родная мова – гэта частка нашага культурнага і духоўнага багацця, яна фарміруе нашу свядомасць і адрознівае нас ад іншых народаў.
Дэвізам святочных мерапрыемстваў, якія прайшлі ў гэты дзень у ДУА “Сярэдняя школа № 24 г. Барысава”, сталі словы “Хай роднае слова гучыць, як песня жаўрукова!”.
У гэты дзень настаўнікі і вучні мелі магчымасць наведаць святочныя інсталяцыі і атрымаць у падарунак паштоўкі-віншаванні, закладкі і іншыя патрэбныя дробязі. Гасцінна сустракалі наведвальнікаў школьныя экскурсаводы ў музеі духоўна-матэрыяльнай культуры беларусаў “Зямля пад белымі крыламі”. У бібліятэцы “Чытай-Град” адбыўся культурны чэлендж “Чытаем па-беларуску!” Ва ўсіх класах прайшлі мерапрыемствы, розныя па фармаце, але аб’яднаныя агульнай назвай “Размаўляем па-беларуску”. Падчас агульнай школьнай акцыі “Смак роднага слова” вучні працавалі над тлумачэннем спрадвечна беларускіх слоў і складалі воблакі слоў: арэлі, ветразі, жывіца, кудзеркі, усмешка, альтанка, журавіны, святаяннік і іншыя. На ўроках настаўнікі беларускай мовы і літаратуры прапанавалі вучням праверыць свае веды праз удзел у моўных віктарынах і анлайн-праектах. Былі арганізаваны і іншыя мерапрыемствы.
Дзень роднай мовы завершаны, аднак працягваюцца мерапрыемствы Тыдня беларускай мовы і літаратуры, якія ў 2025 годзе аб’яднаныя тэмай “Быць беларусам!”. Запрашаем усіх жадаючых паўдзельнічаць у іх. Будзе цікава і пазнавальна.
Л.М.Лапянок, настаўнік беларускай мовы і літаратуры